ટી-20 વર્લ્ડ કપઃ 2007થી લઈને અત્યાર સુધી દરેક ટી-20 વર્લ્ડ કપમાં આ 8 ખેલાડીઓએ ભાગ લીધો છે, એક ભાગ્યશાળી ભારતીયનો સમાવેશ

આઈસીસી ટી-20 વર્લ્ડ કપ 2022 ઓસ્ટ્રેલિયાની ધરતી પર રમાશે. આ ટુર્નામેન્ટની શરૂઆત વર્ષ 2007માં થઈ હતી. ત્યારે ભારતે મહેન્દ્રસિંહ ધોનીની કેપ્ટનશીપમાં આ ખિતાબ જીત્યો હતો. 2007થી 2021 સુધીના દરેક ટી-20 વર્લ્ડ કપમાં ભાગ લેનારા 8 ખેલાડીઓ છે. આવો જાણીએ આ ખેલાડીઓ વિશે.

શાકિબ અલ હસન

દુનિયાના સર્વશ્રેષ્ઠ ઓલરાઉન્ડરોમાં સામેલ શાકિબ અલ હસને અત્યાર સુધી ટી20 વિશ્વકપની તમામ આવૃત્તિઓમાં ભાગ લીધો છે. આ વખતે તે બાંગ્લાદેશની ટીમનો કેપ્ટન પણ છે. તેણે ટી-20 વર્લ્ડ કપની 31 મેચમાં 26.84ની એવરેજથી 698 રન ફટકાર્યા છે અને 41 વિકેટ પણ ઝડપી છે. ટી-20 વર્લ્ડ કપ 2022માં તે સતત આઠમો ટી-20 વર્લ્ડ કપ રમતો જોવા મળશે.

મુશ્ફિકુર રહીમ

બાંગ્લાદેશનો વિકેટકિપર બેટ્સમેન મુશ્ફિકુર રહીમ અત્યાર સુધીના તમામ ટી-20 વર્લ્ડ કપમાં રમી ચૂક્યો છે. તેણે ટૂર્નામેન્ટની 28 મેચમાં 307 રન બનાવ્યા છે. પરંતુ એશિયા કપમાં બાંગ્લાદેશની ટીમના ખરાબ પ્રદર્શનના કારણે તેણે ટી-20 ક્રિકેટમાંથી સંન્યાસ લેવાની જાહેરાત કરી હતી.

મહમુદુલ્લાહ

ઓલરાઉન્ડર મહમુદુલ્લાહે અત્યાર સુધીના તમામ ટી-20 વર્લ્ડ કપમાં બાંગ્લાદેશનું પ્રતિનિધિત્વ કર્યું છે. આ ટૂર્નામેન્ટની 25 મેચમાં તેણે 284 રન બનાવ્યા છે અને 8 વિકેટ પોતાના નામે કરી છે. પરંતુ આ વખતે મોહમ્મદુલ્લાહનો બાંગ્લાદેશની ટીમમાં સમાવેશ કરવામાં આવ્યો નથી.

ક્રિસ ગેલ

ક્રિસ ગેલને ટી-20 ક્રિકેટમાં વિશ્વનો સૌથી ખતરનાક બેટ્સમેન માનવામાં આવે છે. તે સિક્સર ફટકારવા માટે ફેમસ છે, જ્યારે ક્રિસ ગેલ તેની લયમાં હોય છે, ત્યારે તે કોઇ પણ બોલિંગ આક્રમણને ફૂંકી શકે છે. ગેલ ટી-20 વર્લ્ડ કપની 33 મેચ રમ્યો છે, અને આમાં તેણે 40ની એવરેજ અને 146.73ની સ્ટ્રાઇક રેટથી 965 રન બનાવ્યા છે, જેમાં 2 સદી સામેલ છે.

ડ્વેન બ્રાવો

ડ્વેન બ્રાવોએ તમામ ટી-20 વર્લ્ડ કપમાં ભાગ લીધો છે એટલું જ નહીં, તે 2 વખતની ચેમ્પિયન વેસ્ટ ઇન્ડીઝની ટીમનો પણ ભાગ રહી ચૂક્યો છે. બ્રાવો અત્યાર સુધીમાં ટી-20 વર્લ્ડ કપની 29 મેચો રમ્યો છે જેમાં તેણે 24.00ની એવરેજથી 504 રન ફટકાર્યા છે, જ્યારે 25.80ની બોલિંગ એવરેજથી 25 વિકેટ પણ ઝડપી છે. પરંતુ તે ટી-20 વર્લ્ડ કપ 2022માં જોવા નહીં મળે. બ્રાવોએ નિવૃત્તિની જાહેરાત કરી દીધી છે.

મોહમ્મદ હાફીઝ

મોહમ્મદ હાફીઝ વિસ્ફોટક બેટિંગ અને ઘાતક બોલિંગ માટે પ્રખ્યાત છે. તેણે પાકિસ્તાન માટે 2007થી 2016 સુધી દરેક ટી-20 વર્લ્ડ કપમાં ભાગ લીધો છે. તેણે પાકિસ્તાન માટે 30 મેચમાં 511 રન બનાવ્યા છે.

શોએબ મલિક

શોએબ મલિકે પોતાના દમ પર પાકિસ્તાનની ટીમ માટે ઘણી મેચ જીતી છે. તેણે પાકિસ્તાન તરફથી દરેક ટી-20 વર્લ્ડ કપમાં ભાગ લીધો છે. શોએબ મલિકે પાકિસ્તાન માટે ટી-20 વર્લ્ડકપની 34 મેચમાં 646 રન બનાવ્યા છે.

રોહિત શર્મા

ભારતીય ટીમે મહેન્દ્ર સિંહ ધોનીની કેપ્ટનશીપમાં 2007માં ટી20 વર્લ્ડ કપની ટ્રોફી જીતી હતી. ત્યારે રોહિત શર્માને તે ટીમમાં સામેલ કરવામાં આવ્યો હતો. તેણે ભારત તરફથી દરેક ટી-20 વર્લ્ડ કપમાં ભાગ લીધો છે. રોહિતે ટી-20 વર્લ્ડકપમાં રમાયેલી 33 મેચમાં 38.50ની એવરેજથી 847 રન ફટકાર્યા છે. આ વખતે ટીમ ઇન્ડિયા તેની કેપ્ટન્સીમાં ટાઇટલ જીતવાની પ્રબળ દાવેદાર છે.