કોઈપણ વ્યક્તિનાં શરીરમાં જે અંગ સૌથી વધુ ધ્યાન ખેંચે એ છે એ વ્યક્તિની આંખો. શરીરનું સૌથી કિંમતી અંગ પણ આંખો છે. આ આંખોને વધુ ખુબસુરત બનાવવા માટે વર્ષોથી લોકો આંખમાં કાજળ આંજતાં આવ્યાં છે. કાજળ ભરેલી આવી આંખો માટે એક ગુજરાતી ગઝલકાર કહે છે.
“કાજળ ભર્યાં નયનનાં કામણ મને ગમે છે
કારણ નહીં જ આપું કારણ મને ગમે છે.”
કાજળ તમારી આંખોને વધુ નિખારવાનું કામ કરે છે. આંખે કાજળ અને કપાળે બિંદી કરીને પણ સ્ત્રીઓ સોળે શણગાર સજી હોય એવું સૌંદર્ય ધરાવતી લાગે છે. પહેલાં લોકો આંખોને ખુબસુરત બનાવવા કાજળ, મેષ કે સૂરમાનો ઉપયોગ કરતાં પણ હવે એનું સ્થાન આઈ લાઈનરે લઈ લીધું છે.
આઈલાઈનર અત્યારનાં નવા જમાનાની કાજળ છે. આઈલાઈનરને ઉપયોગમાં આવે હજુ માંડ એકાદ દશકો જ વીત્યો છે પણ પોતાની વિશેષતાઓનાં લીધે આઈલાઈનર ખૂબ ઝડપથી સ્ત્રીઓની પસંદ બની ગયું.
ઉપયોગ કરવામાં સરળ, ઝડપથી નહીં ફેલાવાના અને લાંબો સમય સુધી આંખમાં ટકી રહેવાનાં પોતાની આગવી વિશેષતાઓનાં લીધે આઈલાઈનર ટ્રેન્ડિંગ બની ગયું છે.
આમ છતાં જો તમે સ્ત્રી હશો તો તમે અનુભવ્યું હશે કે આઈલાઈનરનો ઉપયોગ કરતી વખતે ઘણીવાર હાથ ધ્રૂજે છે. જેનાં લીધે આઈલાઈનર એ જગ્યાએ લાગતું નથી જ્યાં લગાવવું હોય. આનાં લીધે તમારો પૂરો લૂક ખરાબ થઈ જાય છે. જે આઈલાઈનર તમને ખુબસુરત બનાવે એ જ તમારાં રૂપને બગાડવાનું કામ કરી જતું હોય છે.